jan. 07
Vá hvað það er gaman að lesa gamlar bloggfærslur eftir sjálfa sig 
jan. 07
Jæja, vegna fjölda áskoranna hef ég látið undan og skrifa þess vegna nokkur orð hérna á bloggið mitt fína 
Við erum semsagt búin að skipta um lén fyrir síðurnar okkar, hjelm.is er nýja heimilið, og það er eiginlega magnað að það skyldi vera laust, miðað við hversu margir Hjelmarar eru á landinu.
Síðan ég bloggaði síðast hefur jú ýmislegt gengið á… t.d. er Sæþór búinn að missa 5 tennur núna og 3 fullorðinstennur komnar í staðinn
Ég hélt að ég mundi búa á Íslandi til dauðadags… en það er um það bil að breytast þar sem að flutningur til Noregs er að verða að veruleika. Það er nú meira en að segja það að flytja stóra fjölskyldu milli landa, allavega erum við komin á það að selja búslóðina nánast alla og taka bara nokkra kassa af smádóti og fötin okkar með. Ég er bæði spennt og kvíðin og full af tilhlökkun, allt í einu.
Allavega… framtíðin virðist bjartari en oft áður, og það hlýtur alltaf að vera af hinu góða 
Já, ég gleymdi einu… ég smitaðist í sumar af alræmdri bakteríu sem virðist ólæknandi með öllu. Nú lítur allt út fyrir að ég verði að aðlaga líf mitt og fjölskyldunnar þessari bakteríu, það kostar víst fórnir og peninga.
Prjónabakterían
Verið velkomin á hjelm.is þar sem ég blogga, Beggi bloggar og svo verður myndasíðan uppfærð líka.
feb. 06
Ég held að ég sé heimsins lélegasti bloggari… allavega er ég að slá hvert metið á fætur öðru í að hafa lengra og lengra á milli hverrar færslu. En það er komið nýtt lúkk á bloggið… blátt og fínt
En fréttir dagsins eru semsagt þær að Sæþór Aron, sem verður 5 ára í ágúst var að missa fyrstu tönnina sína í dag! Honum tókst að brjóta framtönn í neðrigóm við að reyna að ná stilk úr epli. Stilkurinn var eftir en tönnin gaf sig og var laflaus… við fórum með hann til tannlæknis og þar var hann auðvitað hetja dagsins og lét bara taka tönnina úr eins og ekkert sé Mamman og pabbinn að farast úr stolti að sjálfsögðu, hann var ekkert hræddur og hann bara brosti og sagði að þetta hefði nú ekkert verið neitt vont, gaf svo tannlækninum bara þumalinn upp(thumbs up) og þakkaði fyrir sig. Ég hefði ekki staðið mig svona vel, viðurkenni það fúslega að tannlæknar fá sjaldan að komast upp í minn munn.
Meira síðar…
nóv. 03
Ég vaknaði í morgun með stærri hnút í maganum en í gær. Sami draumurinn ásækir mig aftur og aftur, eða öllu heldur martröðin. Það er svo dimmt í kringum mig að ég sé ekki hvert ég stefni. En ég held samt áfram í þeirri trú að finna ljós. Það er langt síðan ég hætti að sjá það. Mikið vonleysi grípur mig, en ég held samt áfram í myrkrinu. Það standa glerbrot upp úr jörðinni, en mér er alveg sama, ég þarf bara að halda áfram. Ég er hrædd, og er ekki viss um að ég vilji vita hvernig þetta endar. Myrkrið verður bara svartara og það er erfiðara að halda áfram. Það er ekki gott að dreyma svona. 
okt. 11
Þetta fékk ég sent frá góðri vinkonu, og bara varð að nappa því og setja það hérna
Ljós í myrkri:
Ég vakna þennan morgun og vel að hann sé góður
vel að hann sé yndislegur, myrkur og hljóður
ég vel að kúra um stund og staðnæmast við það
hve stórkostlegt sé lífið ef fátt amar að.
Ég ákveð því að velja að vandamálin fá
vistuð séu hjá mér til þess eins að ljá
tilverunni ennþá fleiri tilbrigði og fleti
ég tek þeim opnum örmum svo nýtt mér þau ég geti.
Og eftir litla stund ég vel að fara á fætur
faðma þennan morgun og allar hans rætur
hita mér gott kaffi af kærleik þess ég nýt
kex smyr með osti í blöðin svo ég lít.
Að endingu ég segi við þig sem þetta lest
þetta er góður dagur, hafðu það sem best
ég óska þess að hugsanir fallegar þig finni
ég faðmlag þér sendi og kveð þig að sinni.
Höfundur er Unnur Sólrún
okt. 07
Heimspeki Charles Schultz
Charles Schultz er höfundur teiknimynda syrpunnar Peanuts. Þú þarft ekki að svara spurningunum.
Lestu verkefnið og þér mun verða þetta ljóst:
1. Nefndu fimm auðugustu einstaklingana í heiminum.
2. Nefndu fimm síðustu sigurvegara í fegurðarsamkeppni Evrópu.
3. Nefndu tíu einstaklinga, sem hafa unnið Nobels verðlaunin.
4. Nefndu sex leikara og leikkonur, sem hafa unnið Óskars verðlaunin.
Hvernig gekk þér?
Niðurstaðan er, að enginn okkar man fyrirsagnir gærdagsins. Þetta eru ekki annars flokks afreksmenn. Þeir eru þeir bestu á sínu sviði.En klappið deyr út.Verðlaunin missa ljómann. Afrekin eru gleymd. Viðurkenningarnar og skírteinin eru grafin með eigendum sínum.
Hér eru nokkrar aðrar spurningar. Sjáðu hvernig þér gengur með þær:
1. Skrifaðu nöfnin á fimm kennurum sem hjálpuðu þér á þinni skólagöngu.
2. Nefndu þrjá vini, sem hafa hjálpað þér á erfiðum stundum.
3. Nefndu fimm einstaklinga, sem hafa kennt þér eitthvað mikilvægt.
4. Hugsaðu um fimm einstaklinga, sem kunnu að meta þig að verðleikum.
5. Hugsaðu um fimm einstaklinga, sem þér þykir gott að umgangast.
Auðveldara?
Lexían: Fólkið sem skiptir þig mestu máli í lífinu eru ekki þeir, sem hafa bestu meðmælabréfin, mestu peningana eða flestu verðlaunin.
Heldur þeir, sem finnst þú skipta mestu máli.
Hafðu ekki áhyggjur af því, að heimurinn sé að farast í dag. Það er nú þegar morgun í Ástralíu. (Charles Schultz)
sept. 29
Vinsamlegast svarið eftir sannfæringu og verið einlæg. 
nr 1. Bónus eða Krónan?
nr 2. Kringlan eða Smáralind?
nr 3. Nörd eða Lúði?
nr 4. Steinþegiðu eða Haltu Kjafti?
nr 5. nenni þessu ekki…
sept. 17
Ég hitti konu fyrir stuttu sem ég hafði aldrei hitt áður, það er auðvitað eitthvað sem gerist oft, nema að þessi kona virtist þekkja mig. Svo þegar við fórum að tala saman, þá fór hún að segja mér hluti um mig og líf mitt sem ég hef aldrei rætt við neinn. Þá varð ég pínu óróleg en hélt mig á mottunni því konan var örlítið drukkin og ég vildi ekki vera með vesen. En jú, hún sagði við mig að ég ætti að hætta þessum þegjanda og fara að tjá mig, og segja hluti sem ég hugsa frekar en að þegja og byrgja hluti inni. Þeir sem þekkja mig vel vita að ég er meira fyrir að hlusta á aðra frekar en að vera með eitthvað röfl. Jú auðvitað tuða ég yfir mörgum hlutum, en oft eru það mikilvægari hlutir sem ég held mér saman um. Eins og til dæmis ef eitthvað er að. Allir eiga við vandamál að stríða. Það er alkunn staðreynd. Ég á við vanda að stríða eins og aðrir, ég get til dæmis ekki farið með öðrum á klósettið, það bara er ekki í mér að pissa með félagsskap. Ég get talið upp endalaust af vandamálum sem fullt af fólki finnst kannski fyndin, en í mínum augum kvöl. Þegar ég er krafin um svör við því af hverju ég er niðurdregin, þá þegi ég bara þar til það líður hjá. Afar óhollt fyrir geðheilsuna skal ég bara viðurkenna hér og nú, en þetta er andleg fötlun sem ég stríði við. Ég er svo hrædd við að segja eitthvað vitlaust, að ég þegi bara frekar. Þegar ég verð kvíðin, þá fæ ég í magann. Þegar ég hlakka til, þá fæ ég líka í magann.
meira næst…
sept. 11
Ég er ekki mikið fyrir að játa trú mína á hinu og þessu guðlega dótaríi, en hvað sem það nú er, þá er eitthvað sem vakir yfir litlu fjölskyldunni.
kveðja, Sæunn
sept. 01
Já nú er búið að skíra stelpuna, og hún heitir Sandra Björg Ármannsdóttir Hjelm. Bara hið flottasta nafn. Athöfnin og veislan voru hérna heima hjá okkur og tókst bara vel til held ég, allavega fór enginn svangur heim.
Ég fékk eitthvað æðiskast hérna í morgun, ég er nefnilega vön að leggja mig aftur þegar krakkarnir eru farin í skólann, en í morgun fékk ég mér bara kaffisopa og svo byrjuðu lætin bara. En í staðinn fyrir að sofa eins og venjulega gerði ég þetta: setti í þvottavél, fyllti uppþvottavélina og setti hana í gang, vaskaði upp restina, ryksugaði forstofuna, þvottahúsið, eldhúsið, stofuna, ganginn og baðherbergið, þurrkaði af öllum borðunum, tók til í skóhillunum, braut saman þvott úr 3 vélum og fór með það á sinn stað, bjó um hjónarúmið, fór út með ruslið, gaf strákunum hafragrautinn sinn og svo man ég ekki meir… en þetta þykir kannski ekki merkilegt hjá flestum, en fyrir mig sem er vön að sofa frameftir var þetta sko afrek.
Eftir hádegið fór ég með Davíð Gunnar og Sæþór Aron í gönguferð í góða veðrinu. Já ég verð að segja það að þetta var skrýtinn dagur í lífi letihaugs.
Á morgun ætla ég heldur ekki að leggja mig aftur.